အိပ်မပျော်ခြင်းနဲ့ အိပ်ဆေး
အိပ်မပျော်ခြင်းကို တစ်ညမှတစ်ပတ်ခန့်မျှသာ ကြုံတွေ့ရလျှင် ခဏတာဖြစ်သည့်အတွက် စိတ်ပူစရာမရှိသော်ငြား တစ်ပတ်မှာ အနည်းဆုံး သုံးညခန့်၊ သုံးလနဲ့အထက် ကြာမြင့်နေပြီဆိုလျှင်တော့ ရေရှည်အိပ်မပျော်တဲ့ဝေဒနာ ခံစားနေပြီဟု ယူဆပါတယ်။ ညဘက်အိပ်မပျော်ခြင်းကြောင့် ပင်ပန်းနွမ်းနယ်သလို ခံစားရမယ်။ မှုန်တေတေဖြစ်ကာ အာရုံစူးစိုက်မှု အားနည်းမယ်။ တစ်နေ့တာလုံး အိပ်ချင်နေမယ်။
အိပ်မပျော်ရခြင်း အကြောင်းအရင်းများ
အိပ်မပျော်ရခြင်းဝေဒနာကို ခံစားရစေတဲ့ အဓိက အကြောင်းအရင်းတွေကတော့
- စိတ်ဖိစီးမှုကို ဖြစ်ပေါ်စေတဲ့ ဘဝနဲ့ဆိုင်တဲ့ဖြစ်ရပ်များ ( ဥပမာ အလုပ်ပြောင်းရခြင်း၊ ချစ်ရသူကို ဆုံးရှုံးလုပ်ရခြင်း)
- ပတ်ဝန်းကျင်ရှိ ဆူညံသံ၊ အလင်းရောင်၊ အပူချိန်
- အိပ်ချိန် အပြောင်းအလဲဖြစ်ရခြင်း (ညဆိုင်းအလုပ်ဆင်းရခြင်း၊ နိုင်ငံ ဒေသအပြောင်းအလဲကြောင့် အချိန်ခြားနာခြင်း)
- မျိုးရိုးလိုက်ခြင်း
- စိတ်ကျန်းမာရေး ပြသာနာများ ( စိတ်ဓာတ်ကျခြင်း၊ စိုးရိမ်စိတ်များခြင်း)
- နာကျင်မသက်မသာဖြစ်နေခြင်းကြောင့် အိပ်မပျော်ခြင်း
- Caffeine၊ အရက်၊ ဆေးရွက်ကြီး
- လည်ပင်းကြီးရောဂါနဲ့ တခြားဟော်မုန်းဆိုင်ရာ ပြသာနာများ
- Alzheimer ရောဂါနဲ့ တခြား သတိမေ့တတ်သောရောဂါများ
- ကိုယ်ဝန်ဆောင်ချိန်၊ သွေးဆုံးချိန်၊ သွေးဆုံးပြီးချိန် ... စတာတွေကြောင့်ဖြစ်ပါတယ်။
အိပ်မပျော်ခြင်းအတွက် အိပ်ဆေးကို တစ်ခါတစ်ရံ သောက်သုံးခြင်းဟာ ဘေးမဖြစ်သော်လည်း ရေရှည်အိပ်မပျော်ရောဂါအတွက် ဖြေရှင်းနည်းတစ်မျိုး မဟုတ်ပါ။ အိပ်မပျော်ရခြင်း၏ နောက်ကွယ်က သွေဖယ်နေတဲ့ အကြောင်းအရင်းကို ရှာဖွေဖယ်ထုတ်ရပါမယ်။ မှားယွင်းနေတဲ့ အလေ့အထတွေကို သေချာလေ့လာဆန်းစစ်ကာ တက်ကျွမ်းသူနဲ့ စနစ်တကျတိုင်ပင်ကာ ပြောင်းလဲပစ်ရပါမယ်။
အိပ်ဆေးစွဲသောက်ခြင်းရဲ့ ဆိုးကျိုးများ
အိပ်ဆေးများ ရေရှည်စွဲသောက်ခြင်းဖြင့်
- ခေါင်းမူးခြင်း၊ ခေါင်းကိုက်ခြင်း
- ဝမ်းလျောခြင်း၊ ပျို့အန်ခြင်း၊ ဝမ်းချုပ်ခြင်း
- အတော်ကြာ ငိုက်မျဥ်းအိပ်ခင်မူးတူးဖြစ်ခြင်း
- မှတ်ဉာဏ်ကို ထိခိုက်စေခြင်း
- တစ်နေ့တာရဲ့ လုပ်ငန်းတွေမှာ လုပ်ဆောင်နိုင်မှု လျော့ကျခြင်း
- ကိုယ်အလေးချိန်တက်ခြင်း
- နှလုံးခုန်နှုန်း မမှန်ခြင်း
- ပါးစပ်ခြောက်ခြင်း စသည့် ဆိုးကျိုးများ ခံစားလာရနိုင်ပါတယ်။
ဒါကြောင့် အိပ်ဆေးကို အားကိုးမည့်အစား ကိုယ့်ရဲ့ ပြောင်းလဲဆင်ခြင်သင့်တဲ့ အလေ့အထအချို့ကို ပြုပြင်ကြည့်ကြရအောင်….
- အိပ်ချိန်၊ အိပ်ရာထချိန်ကို အတိအကျ သတ်မှတ်ပြီး အိပ်ပါ။ နေ့ဘက်မှာ တစ်ရေးမအိပ်ဘဲ ညဘက်ကို အနည်းဆုံး ၈ နာရီ အပြည့်အိပ်ပါ။
- ကိုယ်လက်လှုပ်ရှားမှု ပုံမှန်ပြုလုပ်ပါ။
- ကော်ဖီကို နေ့လည်ခင်းကျော်လျှင် မသောက်ပါနဲ့တော့။
- အိပ်ရာဝင်ခါနီး ဖုန်း၊ ကွန်ပြူတာ သုံးခြင်းကို တက်နိုင်သမျှရှောင်ပါ။
- မိမိရဲ့ အိပ်ရာသည် တိတ်ဆိတ်၊ အလင်းရောင်မှိန်၊ သက်တောင့်သက်သာ ဖြစ်ပါစေ။ လိုအပ်လျှင် မျက်စိအကာ (Sleeping mask)၊ နားအဆို့ (Earplugs) သုံးပါ။
- အိပ်ရာမဝင်ခင် စာအုပ်ဖတ်တာ၊ သီချင်းနားထောင်တာ၊ အညောင်းအညာပြေအောင် ရေနွေးစိမ်တာမျိုး ပြုလုပ်ပါ။
- လုပ်ရမဲ့အရာတွေကို စိတ်ပူပြီး မျက်လုံးကြောင်အိပ်မပျော်နိုင်ဖြစ်ရင် စာရင်းပြုစုပြီး ချရေးပြီးမှ ပြန်အိပ်ကြည့်ပါ။
လက်တလော အိပ်ပျော်ဖို့အတွက် ခေတ်စားလာသော Melatonin
ဦးနှောက်မှ Melatonin ဟော်မုန်း ကို မှောင်သည့်အခါ ပိုထုတ်ပေးခြင်း၊ လင်းသည့်အခါ လျှော့ထုတ်ပေးခြင်းဖြင့် အိပ်စက်ခြင်းအချိန် မှန်ကန်အောင် ထိန်းညှိပေးပါတယ်။ အသက်ကြီးသူတွေမှာ Melatonin လျှော့နည်းလာတဲ့အတွက် ဆရာဝန်ညွှန်ကြားချက်နဲ့ ဖြည့်စွက်သောက်သုံးလို့ရပါတယ်။ ခရီးသွားခြင်းကြောင့် အချိန်အပြောင်းအလဲဖြစ်ကာ အိပ်မပျော်မှု (Jet lag) အတွက်လည်း သောက်သုံးကြပါတယ်။
အိပ်မပျော်ခြင်းအတွက် အမူအကျင့်များ အရင်ပြောင်းလဲကြည့်ပါ။ အိပ်ဆေးကို သက်ဆိုင်ရာ ဆရာဝန်ညွှန်ကြားမှသာ စနစ်တကျသောက်သုံးပါ။